مامن ثقل افا عليك خذ راحتك، بالنسبة للمطار اول ما وصلت ماكان في اي مشاكل نهائيا ولا صادفني اي موقف يستحق انه يذكر، محد طلب اكرامية سوى موظفة شركة اورانج ولا عطيتها شي وكملت نزلت جهة القطار وللاسف تاخرت دقائق قليلة عن القطار واضطريت انطر ساعة كاملة، حجزت بالدرجة الاولى الى محطة كازا فوياجير كلفتني 70 درهم اذا ما خانتني الذاكرة والقطار كان تعبان وريحته سيئة لكن بالنسبة لي اعتبرته جزء من التجربة.
بعدها اخذت تاكسي وقابلت صاحب الشقة وكان رجل محترم وعند وعده الشقة كانت نص نص من ناحية النظافة والشياكة لكنها آمنة وفي حي آمن لكن ماقدر اعطي تفاصيل عنها احتراما لرغبة المؤجر، كان في حارس بس ماكان يكلمني نهائي ساعات كنت ادخل مع الضيف قدامه وينزل راسه يسوي نفسه ما يشوف وقمت استحي منه، تالي الايام قمت اخلي الضيف يجيني بشكل منفصل واشتريت للحارس دفاية وكل ما طلعت مطعم او كارفور كنت اشتريله معاي وابن الحلال كان رجل طيب ومبتسم ولا مرة كلمني ابدا.
الشرطة ما صارلي معاهم اي موقف ابدا يمكن بحكم اني ما استأجرت سيارة وكنت ساكن في منطقة راقية وشكلي ما يبين خليجي اصلا ولبسي كان عادي، رغم اني ثقفت نفسي شوي بالقانون المغربي قبل الرحلة لكن الحمدلله ما احتجت هالامور لان ما كلمت اي شرطي نهائيا.
بالنسبة للصرف كنت اسحب باستخدام البطاقة يحسب علي فرق العملة ورسوم 35 درهم على السحبة، وتقريبا كل مكان رحتله كان يقبل الدفع بالبطاقة لكن الكاش كنت احتاجه عشان ادفع للسكن والتاكسي وباقي الامور الي انت خابرها، بالنسبة للمطاعم الامور كانت طيبة باستثناء مطعم كابستون مرة سحبوا مني الحساب مرتين (800 درهم) قالي الاولى كانت بالخطأ وراح ترجع بحسابك ولا عطاني فاتورة ولا رجع شي بحسابي الى اليوم.
المطار في رحلة العودة كان قصة ثانية، بعد ما قصيت البوردنق رحت جهة السكيورتي شافني مال الجمارك ناداني وسألني اذا معاي كاش قلتله لا ما معاي شي وتركني امشي، بعدها بالتفتيش شافوا جوازي وحطوا جنطتي على جنب قالي داخلها بطل ماي قلتله مو مشكلة اخذه وقطه قالي لالا خليه وبعدها بدا يقولي (نتوما اهل الكرم والجود) اكثر من مرة لكني تجاهلته ومشيت، لما رحت للجوازات تكرر نفس الموضوع بس بدون كلام، قعد يسألني عن وجهتي وظل ماسك جوازي بيده ويطق فيه على الطاولة ويتلفت، اتوقع كان يبي يطلب شي بس شاف في ناس حواليه وتفشل بالنهاية رجعلي الجواز بنفسية خايسة وانا مسوي نفسي مثل الاهبل مو فاهم شي وكنت ناوي اذا كلمني اقوله ما معاي كاش، والله عيب موظفين مطار واجهة لبلدهم يسوون هالتصرفات والمفروض محد يعطيهم شي قاعد يأدي وظيفته على شنو تعطيه اكرامية؟
المكان الوحيد الي عطيت فيه اكرامية كان مطعم رامي عياش، كنت ناسي الولاعة وكل ما طلعت زقارة بولعها بالشمعة يجيني الولد بسرعة يعطيني ولاعته وانحرجت منه وعطيته 100 درهم

وسلامتك وسامحنا على الاطالة او اذا نسيت شي