تحذير لمن يذهب الى مراكش

يا جماعة الخير مثل هذي السالفة منتشرة في بلدان كثيرة، وقد حصلت معي في مصر، وأكيد كثير ممن زاروا مصر حصلت معاهم.. لعبة ويكتبون معاك عقد قانوني يلزمك بالدفع ولا يمكن تمسك عليهم شي ( بقوة القانون ) لذلك احذر ولا تغتر بهم ولا بعروضهم.. واحد سعودي طب فيهم في مصر وأعطاهم دفعة وجلس يقسط عليهم مبلغ شهري فترة طويلة ولما حاول يفسخ العقد طالبوه بالشرط الجزائي وعرض الموضوع على محامي وذكر بأن العقد قانوني وما راح يتخلص الطرف الثاني من الشرط الجزائي إلا بواسطة .. المهم: نصب واحتيال بقوة القانون ..

هههههههههه
انا فزت معهم مرة بجائزة 3 ايام مجانا في اي مكان في المغرب
كان السؤال اذكر 3 مدن مغربية الحمد لله جاوبت صح وفزت معاهم ورحت لمقر الشركة (لاني ابغی اشوف اخرتها معاهم)
كان في فندق في جليز قريب مقرهم في البيدروم لم رحت قابلت مدير الشركة قالي مبروك فزت ب3 ايام مجانا لكن بالاول لازم تكون عضو في الشركة عشان تستفيد من الجائزة وعشان تكون عضو لازم تدفع 500 دولار وتستفيد من باقي عروضنا قلت له اوك بصير عضو لكن بالاول اتصل علی النخيل الي انة ساكن فيه وعطيتة الرقم وقلت له شوف اذا بيمددوا لي 3 ايام جائزتك هذي ولالا قام يصرف عطيتة ظهري ومشيت .

الحركة هذي في كل مكان واجهتها ،،
في الأردن وفي دبي ومصر والرياض وجدة ،،

الغريب في الموضوع انهم يتبعون نفس الاسلوب ،،
يجي يسألك سؤالين او ثلاثة ،، طبعا اسأله بايخة وسهله ولا هوب ضروري تجاوب وممكن يغششك بعد ،،

ثم يصافحك بعدها مصافح الابطال الفاتحين ،،
ويقولك ألف ألف مبروك ربحت معنا جائزة !!!!!!

ثم يقولك هات ٥٠ ريال !!!!

تستغرب ،، ثم تسأله ليش !!! شلون اربح الجائزة وانت اللي تاخذ فلوس ؟؟!!!!
يقولك هذا تأمين لحد ماتجينا في المكتب وتاخذ هديتك ،،

تقول طيب ماشي ،،

ويحذرك أن في حالك تأخرت أو تخلفت راح يروح عليك التأمين والجائزة !!!!

تجيهم في المكتب ،، ثم ينفردون بك ،،

ويسألونك كم مرة تسافر ووين تسافر ،،

وهاتك يانصب ،، ماخليت ديره ماقلت له اني رايح لها ،، يقالك أني ب احجر له

ثم يعطونك عروض سياحية خيالية في حوالي ٥٠ ألف فندق في العالم ،،

بعضها مجاني على كلامهم وبعضها أخو البلاش في فنادق ومنتجعات خمس نجوم ،،

ويطقها سالفة معك اكثر من ساعه ويوجع راسك بالكلام ،،

ثم في الأخير تسأله بكم هالكلام ؟؟!!

يقولك هذا البرنامج قيمته الأساسية ٢٥ ألف ريال ،، إذا حاب تشترك الآن نعطيك خصم ويصير ب ١١ ألف ريال ،،
وقتها كنت ابي النحشة بس ،، قلت طيب افكر وارجع لكم بكره ،، قال لااااااا ماينفع ،،،
الدفع فوري يله بسرعه لا يفوتك ،،

قلت فيه شبكة ؟ قال لا ،، ( حسيت بالأمان )

قلت ب اروح اسحب من الصراف وارجع ( ادور النحشة ) ،،
قال ماينفع ،،، من تطلع مع الباب ينتهي العرض ،، لازم تدفع وانت على قعدتك ،،

لكن من باب التعاون ،، معك وعشانك انت بس ،، راح نرسل معك واحد يروح معك الصراف ،، عطه الفلوس واذلف !!

يوم جا معي ورطت به ،،

وقفت عند بقالة وعطيته ١٠ قلت جب عصير وموية
ومن دخل البقالة العطيط يابوووو ،،،



حبيت اوضح لكم ان السالفة منتشره عندنا اكثر من المغرب

وسلامتكم

شكرا على التنبيه

هذولا نشوفهم بجدة أعطيهم على جوهم وماراح يحصلون شئ

هذي القصه صارتلي في اول رحله لي بالمغرب قبل تقريبا 8 سنوات وقتها الدنيا هانيه ومافي مشاكل ولا شي طبعا قبل الربيع العربي

السالفه كنت مع صاحبي راعي التاكسي نتمشي بعين دياب وشكل راعي التاكسي خليجي مسوي سكسوكه وما تفرق بينه وبين الخليجي
جلسنا نمشي بالكورنيش وقال بروح السوبر ماركت اجيب عصير ودخان وقلت اوكي انتظرك هنا واول ما مشى
جوني اثنين بنت وولد ورحبو فيني وانا جالس بالزاويه ادخن وقالو عندنا عروض وجوايز ممكن نسئلك قلت لا قالو سوال بسيط قلت انا مشغول
واعتذرت منهم بادب لان مابي وجع الراس وعارف وش نهايتها معاهم
فجاء البنت شتمتني وقالت انت مو رجال ولا خايف !!
افا هنا بدا الغلط وعلى طول رديت عليها وجاني المغربي يبي يتضارب معايا واول ما بدا يمسكني جاء راعي التاكسي جري
يدافع عني وقال ايش صار قلت صار كذا وكذا فجاء راعي التاكسي جاء للبنت وتكلم معاها بالمغربي بشكل تهديد وجتني البنت اعتذرت ومشت
فنصحني راعي التاكسي قال طنشهم وسوي نفسك ما تسمع ولا ترد عليهم
الخلاصه هذولي يشوفوك ضحيه فلازم يفترسوك ويطلعو منك اي شي فالافضل التطنيش

__________________

هذي شركه اسمها LTV قابلتهم في مراكش وفي كازا

السيناريو

سؤال سخيف

فزت معنا

تعال المكتب

ترحيب وكأنك حررت القدس

مديره تسويق تجلس تسولف عليك حوالي ساعه عن شركتهم وعروض وهميه واسعار لايصدقهاعاقل

في الاخير يطلبون منك قبول العضويه وراخ تدفع لهم مبلغ شهري ودفعه مقدمه

البعض للاسف يصدق كلامهم

انا رحت لمكتبهم ف كازا عشان اشوف اخرتها معهم

بعد ماصدع راسي من كثر كلامهم قلت بفكر في الموضوع وراح اجيكم بكره

قالوا لا اليوم اخر يوم ف العرض . من بكره يتبدل السعر

نصيحه اي شخص يعترضك ف الشارع قوله ماعندي وقت وامشي وخليه

العاقل خصيم نفسه

ههههههههههههههههههههههههه هههه حركاتهم مضحكة ,, مليت منها في باقي الدول العربية وصارت عندي مناعه

الحل اخي الكريم بكلمة واحدة ( التجاهل ) ,, كمل طريقك ولا كانك سمعت او شفت شي وانتبه ترد عليه ( لا ترد )

والموضوع لاينحصر على الجوائز فقط ,, انتبه !! اي شيء يعرضونه عليك في اي دولة سياحية لا تقبله واستمر في طريقك

لا تقبل المبيعات ولا تقبل العروض ولا تقبل اي شيء ,, هذولا صيادين السياح كالغربان نذير شؤم كل المصائب تأتي معهم , والله ما تشوف الخير لو تلحقهم

وخاصة وجه البومة سواق التاكسي ,, يا ويلك منه هذا متخصص بالتنكيل بالسياح

لا مسابقة في المغرب بعد اليوم ,,,