تحذير من سمسار فلل مراكش ( عبدالصمد )

كويتي كلامك عين العقل والله العظيم صادق

يا اخوان الكلام المثالي كلن يقدر يقوله لكن بالواقع الامور غير ..

يعني بالله انت بتروح بفترة عز الموسم بالصيف ضروري تحجز بدري والا كل شي فل ! وضروري عربون مافي اي شركة معتمدة بالمنتدى تعطيك حجز موكد الا بعربون ، واللي يقول تروح تدور بنفسك هذا انا رحت بعد هالسالفة يومين كاملات الف مراكش كل فلل طريق فاس واوريكا و ورزازات فل حتى النخيل كل البوابات فل والروز قاردن انحدينا عليه ومابقي الا فيلا وحدة وكان من حظنا انها فاضية ،

وبالنسبة لموضوع احول عربون لسمسار بالنت ، انا لولا توصية الاخ ابو فالح ماحولت له وابو فالح معروف باسلوبه وتعامله بالمنتدى يعني الرجل ثقة لكن عاد هذا اللي صار ، مارحت ادور سماسرة عن طريق طيور ليل ولا ناس ماعرفهم .

الله يعوضك خير ومافيه حد مااكل مقلب في حياته والموهيم انك نبهت الجميع عن النصاب

السلام عليكم ورحمة الله وبركاته
اخوي العزيز
انا صحيح عطيتك رقم الرجال بحكم تعاملي معاه كذا مره وارسل عليه شباب في حال عدم توفر سكن عندي بالفله ابعث له ربعنا واخوانا ويشهد الله انه ما صار منه اي موقف مهو زين من الرجال
انا مو في موقع الدفاع عنه لكن حبيت اوضح الصوره لك وللجميع
الموضوع انه الرجال حجز لكم الفله ودفع العربون لصاحب الفله وعقب ما جيتوا صاحب الفله نكبه وقال الفله فيها زباين مددوا ولا هو عطاكم الفله ولا رجع الفلوس له عشان يعطيكم العربون واقسم بجلال الله والله علي ما اقول شهيد انه للحين ما رجعوا له الفلوس وانا للعلم ارسلت له صورة من الموضوع وقلت له انت معطي الرياجيل بلوك وقالي والله ما عطيتهم بلوك ولا شي ولا جحدت فلوسهم لكن ابن الحرام ما عطاني فلوسي وانت تعرف اني علي قد حالي والله اول ما يعطيني فلوسي راح اتواصل معهم وهذا اللي حبيت اقوله وانا يعلم الله ما قصدت الا مساعدة ربعنا ولا لي ناقه او جمل بالموضوع كله

حياك الله وانا ذكرت القصة زي ماصارت وان فلتك ماكانت متاحة للتاجير وانك دليتني عليه ومالومك ، لكن بالنسبة لعبدالصمد مالنا علاقة بمن اعطى او لم يعطي العربون، انا كزبون يعطيني عربوني وبعدين يدبره من الشخص اللي سارقه سواء عن طريق الشرطة او المحاكم الموضوع مالي علاقة فيه حتى اجلس انتظر .

واكرر .. مشكلتي مع عبدالصمد ولاناقة لك ولا جمل بالموضوع عشان كذا حطيت هالتحذير. اذا مايقدر ياخذ حقه من حرامية مراكش مايستاهل احد يعتمد عليه بالحجز .

انا استغرب لما يجي شخص يقول انا حولت ولا دفعت مبلغ سوا كان كبير ولا صغير او سكن في مكان عشوائي يعني لا فيه استقبال ولا مكتب ولا شي كذا خذ الفلوس عطني المفتاح غلط
ياشباب الي يبي يسكن يسكن عند طريق معلن في الموقع معتمد من الأداره
او عند طريق منتجع ابو فندق البعد كل البعد عن الفلل الخاصه والشقق الخاص
والله يعوض عليك

ياليت لو قدرت نعرف موقع الفيلا بالضبط عشان داتا بلاك لست

بصراحة اللوم ع الشخص الي دلك عليه
والله يعوض عليك
وماقصرت حذرت الشباب ف المنتدى من التعامل معه

ربي يعوض عليك ، حسبي الله ونعم الوكيل ، صدقني ما راح يتوفق مِن اكل مال حرام ..

مع احترامي لك و للجميع ..... انت ماتعرف تتصرف ... مراكش فل منتجعات واقامات و السكن متوفر طول السنه .... الاماكن اللي عليها ضغط الدرقاوي و السكن بين المقابر اقصد الروز و الاماكن الحقيره اللي جماعتنا ساكنين فيها .... مراكش فيها اقامات ومنتجعات كثيره لا تعد ولا تحصي للي يحب ينبسط بحدود المعقول و الاسعار توصل لاقل من النص عن الاماكن المعروفه للخليجيين ... يا الغالي مو شرط تشغل الصوت تنافس تربل فايف من اعلي !!!!!
وموضوع انك مالقيت سكن هذا انا اعتبرك يا جديد علي مراكش يا ماتعرف تتصرف
اخر زياره لي بمراكش قبل شهرين تقريبا سكنت بمنتجع ( اقامه ) خمس نجوم حدائق و حمامات سباحه وثلاث غرف كبيره ثنتين ماستر ووحده عادي وجيراني اجانب اوروبيين و الاقامه شبه فاضيه مافيها الا انا ويمكن شقتين فيهم سكان .... وادخل واطلع واموري طيبه عيب السكن وجود كلاب اعزك الله مع الحراس ينبحون علي ضيوفي خهخهخه علي فكره الليله كانت بالف درهم بدون ابتزاز باي شي
واللي ما يعجبه كلامي يروح للدرقاوي و الروز ومنوار ويسكن بين القبور