تجربتي من اول يوم 26/6/2019

يومنا الثالث
صحينا متأخرين تقريبا 10 مساء ادينا فروضنا ورتبنا امورنا وكلينا فواكه و لا حجزنا ولاشي ولا قررنا وين نسهر
ركبت السياره وخويي الدليل وعلى جليز

مكان حلو والناس حلوين فيه ومحترمين وكلن بحاله فيه ناس تطلبك فلوس بس ياخي والله ابتسامه ودعوه طيبه وصد افضل من انك تتجاهله ما حسيت انه شي ضايقني تمشينا في هالمكان الحلو واليوم اجازه عندهم والناس طالعه واجواء حلوه والجو يرد الروح هوى نسناس وتتمشى المهم لا يفوتكم ياللي اول مره ترحون مراكش
تعشينا بماك
رحنا ستاربكس خذينا القهوه وجلسنا وبس اطلق نظرك في العالم شعب طيب بالحيل بالحيل وللاسف كثير بالمنتدى عندهم سلبيات عن المغرب غريبه يانه مهوب طيب ولا مهوب طيب صدق يعني وحده من الثنتين يعني باختصار البلا فيك حبيبي راجع نفسك

جاو اخويانا اللي امس معنا في ستاربكس وسوالف وضحك وبما ان خويي جوه سهر بحكم انو بس عنده 6 ايام وصرنا 4 قررت انزل من دفعه السهرانين اليوم وقلت ثلاثه وضعكم اوك ، قالوا ودنا تكون معنا تشطح وتفل، من يوم عرفت شي اسمه ديسكو ما اعرف اجلس لان يجب عليك ان تعيش جو الديسكو ولا تفكر باحد اما تجلس مبرطم وتسرح ياخي اجلس في سكنك ههههههه رفعوا في وما مشى الحال طفشنا من ذا الفكره هههههه قلت قسمه الطاوله ماشيه معك ياخويي واعذرني معك 2 بدالي وسمح لي بعدها
رحت انا وخويي ولا لقينا الا طاوله وحده فوق في الدبليو تأخرنا في الحجز
رغم ان محمود اتصل اكثر من مره بس كنت نايم كان بيضبطنا بطاوله بموقع زين بسعر زين

المهم، هذا اليوم الثالث اكثر شي اعجبني في المغرب الى اليوم جوها واحنا بعز الصيف راحه عجيبه وثاني شي شعبها الطيب، انت محترم تفرض احترامك على الكل ويحطونك فوق روسهم

من اول يوم جيت مرت قدامي مواقف مابي احكيها عشان ما اكون سلبي ولكن ياشباب ياللي تقرون كلامي

ماعندك كنترول؟ ما تقدر تتحكم بنفسك وتكون محترم وراقي ياخي لا تسافر وتهين نفسك وتهين سمعه بلدك
اضبطوا اعماركم كل شي له حدود، لا تعتقد اسمك فلوسك تنجيك اذا منت محترم ومتطاول وماعندك كنترول نهايتها يفركون خشمك فعشان كذا اركد حبيبي

اعذروني على بعض الكلام ولكن لعله يصحي عقول وقلوب نايمه

الله يعطيك الصحه يا صاحبي
متابعين لك

استمتع يا بوتركي ولا عليك من التجارب السلبية .. حالي من حالك سفرتين بدون اي سلبية كبيرة تذكر .. في سلبيات لكن موجودة بكل الدنيا .. يعجبني الشخص الايجابي.. بس سؤال .. منوه محمود هذا الي يرتب لك حجوزات السهر؟ لأني كنت اخذ لي مشوار اروح بنفسي ادفع عربون واحجز

الحمدلله على السلامه ابوتركي ورحلة سعيدة. ولو أن جوك ماعجبني كله سهر في سهر مدري متى بتترك هالشله اللي تعرفت عليهم وحرفوك عن خطتك الاولى في الاستمتاع بالطبيعة والأكل الطيب.. ثلاث ايام مازرت اوريكا والمصيبه تعشيت في ماك ! يا الهي يا ابوتركي أن كان تركت الملذات المراكشيه ورحت ماكدونالدز..
المعذرة على صراحتي. وان شاء الله تعوضها في باقي الايام.

حمدالله على السلامة ورحلة موفقة بإذن الله
واتفق مع ابراهيم ماكدو وفي المغرب!!
وين الطنجية والطاجين وين اللحم المشوي والمبخر وين الرفيسة والدجاج المحمر، وين الحلويات، هذي رابط لعلك تستفيد منه:
https://www.mza3et.com/morocco39834.html (مطعم " شهيوات فركوس" مطعم “winoo" باستري “amoud”)

وفيه مطاعم سهرات كثيرة في مراكش، على سبيل المثال لا الحصر "Malak Emeraude" بجانب الدبليو، و "الفاسية" والكثير الكثير ، نظامها مكان راقي كلاس واكل مغربي فريش ولذيذ وسهر عربي اندلسي.

يعطيك الصحه واستمتع ياصاحبي .. ‏مراكش مدينة جميله لكن الله يهدي العينات اللي خربتها شوهت سمعتها وصار الواحد يتحرج يذكر اسمها .بالنسبه لماك ما اشوف ‏فيها شيء خصوصا آخر الليل ما يكون في مطاعم فاتحه كثير والخيارات قليله.. ‏وأحيان بعدك ماودك تثقل اخر الليل ... واحيانا برضو تمل من الأكل المغربي كل يوم لحم لحم فتكسر الروتين بماك...

الحمدالله ع سلامتككك واصل في تقريرك الرائع

هو معلن هنا

الله يسلمك هههههههه


والله مهوب جويي هو لابد يوم يومين تسهر تطلع مواهبك
الشله يبون ينبسطون وانا مبسوط الحمدلله الامور تمام وان شاء الله يومين وبعدين على اقادير وتغازوت مع ذيب جاء اليوم.

والله ماكملت البرقر الحمدلله على النعمه
ولابد زياره للاماكن اللي قلتها، وفيه اماكن في بالي بروح لها
راحوا الشباب الدبليو واموري في الفله تمام صديق لي حلف يجيب الاغراض على حسابه ويطبخ لي
وسوا هذاك العشاء الطيب اللي يعشي بلد
وكلينا ورجعوا الشباب وكلوا

والايام الجايه اكيد ماراح اضيعها

الله يسعدك واشكرك وكلامكم صحيح والله ماكملته بس تعوضنا بعشى حلو وجلسه حلوه.

واكيد والله في بالي سجلت اماكن كثير وناوي احدد وازورها
واشكرك على ردك