تجربتي من اول يوم 26/6/2019

في هذه المواقف ، أفضل الردود الصمت والتجاهل

استمر يبو تركي ‏وامتع نفسك وامتعنا بما تقدم
لاتنسى تزور تغازاوت تبعد عن اكادير ربع ساعة واجلس في مقاهيها على حزة الغروب

وفيه منطقه بعد تاغازوت اسمها ايمي ودار جميله جداً وفيه مطعم هناك اسمه
le petit pecheur يقدم مؤكولات بحريه واطلالته جميله ع البحر وفيها كافيهات واسعاره ممتازه

اشكر من رد علي ومن نصح وساعد كانت رحله جميلة وتجربه حلوه
مراكش غير مؤسف عليها.

بنهي تجربتي وبحاول اختصر كل ما يخص اكادير

اكادير منوعه وحلوه سكنت في المارينا صح ان الاثاث قديم والخدمة تتاخر شوي مثل التنظيف او الطلبات والخ... والسبب زحمه شبه فل ولكن يميزها الموقع للاشخاص اللي يحبون يطلقون نظرهم ويتمشون ويتمتعون والمطاعم تحتك وكلها حلوه الا واحد لا تقربه في المارينا "loql"
المطاعم الباقيه حلوه جدا
ويميز المارينا تمشي برجولك للشاطى وتلفه وترجع للمارينا ماتحتاج سياره ولا شي حقها يومين تاخذ جوله او دباب بحري تمتع نفسك.
المطاعم للسمك عندك
Le petit pêcheur
له فرعين واحد جنب كارفور وواحد في السلام
لاباس فيه مو ذاك الزود
مطعم pure اللي في المارينا افضل منه
فيما يخص السمك

فيما يخص الطواجن
عندك شواية النهضه
وعندك المقهى الفلسطيني
اكلهم منوع وخصوصا المهقى الفلسطيني جلسته عذاب على البحر الموج يصفق في الجلسات بس عيبه مافيه شيشه
المقاهي عندك
مقهى مبروك حلو وجلساته على المسبح ويقدم شيشه
عندك تغازوت لازم تزورها قبل الساعه 6 بتوقيت المغرب
مقاهي وجلسات حلوه مالقيت مقاهي شيشه هناك
وافضل مطعم للطواجن اسمه بركه او البركه
طبعا مو مثل المارينا مقاهي حلوه وراقيه
شي بسيط ولكن يقدمون لك كل شي تبيه والجلسه حلوه وراعي البحر والسباحه والرياضه المائيه راح ينبسط بالمكان
حقت عصريه وعشاء وتعال راجع
وعموما اكادير لعشاق البحر والجو الحلو

اماكن السهر في اكادير المشهوره والمزحومه وماسهرت الا مره كاش ومثله مثل اي مكان سهر
جلست شباب في المارينا وسولفنا جربوا
تايقر
ومدحوه
وافتر بارتي صحاري
ومدحوه بس يقولون العالم فيه مهيب صاحيه لان يجونه فل
الباقيات شبه فاضيه
سكاي كان جنبي اشوف ناس تدخل له بكل وقت من العصر لليل دخلته اخر الليل الساعه 3 فجر قبل انام وكنت لابس شبشب الله يكرمكم ولا احد قال كلمه
احط عيني يمين الا شواذ احط عيني يسار الا شواذ
اشكال مقرفه ومكان قذر واللي جالسين فيه اقذر واقذر حامت تسبدي

المهم اعتذر لو قصرت في شي واتمنى افدتكم
واللي مهتم بالسياحه بزياده والحريه المطلقه ترا المغرب مهيب ديرتك باختصار
وانا شخصيا ماراح يرجعني للمغرب شي هي حلوه وتجربه حلوه بس مهوب اللي في خاطري
واتمنى من ربعنا يركدون شوي ويرحمون انفسهم لكل شي له حد لازم تسوي ستوب (توقف) في حياتك ما اقول اني ملاك او منزه كلن منا لديه عيوب واسرار ونحاول بكل جهد ستر انفسنا ولا اتكلم عن فئه عمريه محدده اتكلم عن اشخاص شفتهم اعمارهم في ال40 وال45 مبهذلين حالهم على وش ! للاسف ولاشي يحمل
واخيرا اقول بكل فخر الله يعزنا الله يعزنا ويزيدنا عز وخير ويعز السعودية ولا يرينا مكروه والله يحفظ بلدنا من كل شر ولا يجعلنا نحتاج لاحد والله يكفينا شر كل حاسد

نسيت فيه مقاهي على الشاطى خل مقاهي المارينا على يسارك وابتل رح يجيك الشاطى على يمينك والمقاهي على يسارك مكان حلو وتتمشى فيه وجلساته حلوه وراح تنبسط فيها وتقدر تسبح هناك وتنبسط

الله يعطيك العافيه ابو تركي .. تجربه جديده وبلد جديد وامتعتنا بالتغطيه وذكر يومياتك. شكرا لك ... وأبد لا تتحسف ولا تتضايق,, وترى مراكش حلوه وفيها اماكن ممتازه للتمشيه والأكل الطيب لكن القروب اللي كنت معاهم نظامهم سهر في سهر يمكن هم اللي خلوك تكرهها ومراكش صدقني مو مكان فقط للسهر .... عموما هي كذا البدايات لازم تواجه بعض المصاعب والمنغصات لين تدل الدرب وتعرف للمغرب.. لكن اللي متاكد منه انك راح ترجع مره ثانيه للمغرب والأيام بينا

وفقك الله كلامك صحيح ومو متضايق ولا متحسف ابد بالعكس الاجواء خيال فوق الخيال مريت دول ماشفت مثل هالاجواء وخصوصا في الصيف معتدله مستحيل تتضايق منها، ولما اقول ما اعتقد لي عودة قرار نهائي ولاسباب خاصة، ومو يعني ان المغرب مو حلو بالعكس حلو كثير واجواء خياليه وصفها صعب وتستحق التجربة.

الزبدة انا قبل اسافر سمعت كلام سلبي كثير عن المغرب وسألت هنا وسألت اصدقاء لي حسسوني انهم رايحين كوبا ومع التجربة حصلت مبالغه كبيره في السلبيات بالعكس بلد جميل. وباذن الله مسافر بكرت والله ان قعدتي هنا ابرك من حر الرياض ولكن ضروري امشي.
والمهم للي يبون يسافرون ومترددين اقدر اقول لهم

تقدر تسافر وحدك وتنبسط لا تحتاج لخوي ولا تطلب خوي ولو انعرض عليك محمول مكفول نصيحه خلك لوحدك
الامور سهالات كثير
اغلب الشعب طيب وفي حالهم
لا تحتاج لسائق ابداً
البلد امان امان امان كنك ببلدك

اهم شي تكون محترم حالك وما تلقى الا كل خير
لابد من بعض المواقف وتحصل بدول كثير ولكنها مو هذاك الشي الكايد يعني تمشي الامور
الدرك او الشرطه طبيعي جدا اذا شافوك خليجي يوقفونك بس تراهم طيبين مره اربط حزامك وخلك نظامي وابد ياخذ اوراقك ويشوفها ويفكك ولو فيه غرامه سرعه او عدم ربط حزام وش هي يعني 300 درهم او 500 تدفعها وتمشي اهم شي لا تعطيه بدون ورقة الغرامه والدفع عشان يفكك مخالف خذ ورقة المخالفه وادفع وبس.
اماكن السهر بكل دول العالم اللي فيها من اسوء طبقات المجتمع فلا تتوقع الافضل.
النظام بالمغرب لا يسمح لك مصاحبه انثى وخصوصا اذا كانت مغربيه بالشارع او بسيارتك ولا بينكم علاقه زوجيه لذلك تجنب الاحراج والمسائلة وخصوصا بمراكش، اكادير سهالات بس بعد ممنوع نظاماً يعتبر قضية فساد، والشعب يتضايق كثير لما يشوف معك انثى مغربيه بالاماكن العامه ويغلطون عليها اكثر من انهم يغلطون عليك لذالك وجب التنويه

يسعد لي جووووك ياشيخ
قريب جدا من جوي
فعلا مراكش طلقتها بالثلاث
اغادير جيتها ماارتحت فيها كثير
كم يوم ومشيت
كازا ارتاح فيها اكثر وطنجة تعجبني كثير
سياحتي نهاريه اروح اماكن حتى المغاربه
مايروحون لها
تسالني عن السهر اقولك اني على 11 اكون بشقتي
اشوف لي فيلم او ارسم شي بدفتري
لاني هوايتي تلازمني وين مااروح
وانام على 1 بالكثير

اعجبتني صراحتك
واتفق مع كلامك كثيرا فيما ذكرت
في ذيك الدهاليز المظلمه
والمبالغ اللي تنصرف فيها على غير سنع

رحلة موفقه

بذي صدقت وربي
الف مره حاولت اترك المغرب ما قدرت
جربنا عدة دول ما يفيد

راح ترجع ترجع