السكن والامان في المغرب

السلام عليكم
اول شي اسال الله ان يرفع عنا هذا البلاء وترجع ايام السفر والمغامرات كما كانت وافضل ان شاء الله
اخوكم جديد لكن متابع لهالمنتدى من فترة تتعدى السنة حاليا واحب اشكر الجميع على المعلومات الموجودة فيه، انا عن نفسي متعود اسافر اوروبا ودايما اروح بروحي وودي اغير الوجهة للمغرب لكن موضوع الامان مسببلي مشكلة بصراحة لان الواحد وده يسافر يستانس بدال ما يقعد يوسوس ويشيل هم الدرك ممكن يداهمه او احد يبلغ عليه، لذلك ودي استوضح بعض الامور:

1- على اعتبار ان الفنادق هي التوب من ناحية الامان: الظاهر لي ان السياسة العامة في الفنادق هي منع دخول الزوار ولكن بشكل غير رسمي ممكن تفتح لهم غرفة، هل الموضوع هذا عرف سائد ولا يخضع لمزاج موظفي الاستقبال وعلاقتك معاهم ودهن السير؟ وبشكل عام شلون الواحد يقدر يتغلب على هالمشكلة في الفنادق؟
2- هل كل الاماكن الخاصة مثل الشقق والفلل عليها سكيورتي ويشوف الطالع والنازل؟ وهل الاماكن السياحية آمنة بشكل عام بحيث اقدر اسكن في مكان مافيه سكيورتي واريح راسي من التعامل معاه؟
3- انا متعود على المواقع الاجنبية للحجوزات وتحديدا airbnb والسبب الرئيسي انها تحفظ حق العميل بحيث ان الموقع يحصل المبلغ ويخليه عنده فإذا المؤجر اخل بالاتفاق تقدر تشتكي وترجعلك فلوسك وفوقها اعتذار وتخفيض لتصنيف المؤجر، السؤال هو ليش محد يستخدم هالمواقع للحجوزات؟ اذا الموضوع بالسعر انا ماعندي اي مشكلة اني ادفع اكثر واعتبره تأمين يحفظ حقي كمستأجر، او هل هناك سبب ثاني؟

واذا اي احد كان عنده اضافة بهالموضوع ياريت ينورنا فيها، وشاكرلكم وقتكم ومجهودكم

يا خوي المغرب غير المغرب عالم اخر

روح للمغرب ومتره طول وعرض الامور هانيه والمغرب واعر وزوين

بالنسبه لأسألتك كلها الاجابه( لا )

__________________
ليت لي من عناء البعد راحه
يابهجة الخاطر وكثر الأمنيات

وعليكم السلام ورحمة الله وبركاته
مرحبا اخوي العزيز فهد تحياتي لك

اخوي العزيز فهد اذا تبي تسافر ولا تبي احد يزعجك سهله لا تخالف نظام البلد وبكذا تريح نفسك ولا فيه احد يقدر يعترض لك اما اذا كنت تبي تخالف فألف سيناريو وسيناريو ممكن يحصل وكمان ممكن ما يحصل شيء تعتمد على متغيرات كثيره تعرفها بعد زيارات عديده للمغرب او ممكن تعرفها من اول زياره اذا انت نبيه

اما سؤالك عن الموقع المشهور هذا حق السكن فهو شغال بالمغرب لكن اغلبية المعروض فيها هي شقق في اقامات يقيم فيه ناس وعوايل واطفال يعيشون حياتهم الطبيعيه والسكن له عسّاس مسؤول عن الاقامه ويثقون به اهل الاقامه وكل حي له جماعه يتحكمون في الحي بل فيه مدن فيها حظر تجول (غير معلن) حتى قبل كورونا بعد 9 مساء ما تشوف احد بالشوارع مثل بعض مدن الشمال مما يعني انه لا يناسب نمط كثير من المزاعيط ويناسب مزاعيط اخرين ومهوب شرط اغاني او غيره انما بعض الاقامات تغلق الساعه 11 مثلا وكلها تقريبا ممنوع نهائيا رفع صوت الموسيقى وهكذا اخي العزيز

من القصص الطريفه اني كنت في مدينه في الشمال وفي وقت وجودي احد الفنادق قرر استمرار فتح (المقهى) الى الساعه 11 مساء بعد ما كان 9 مساء ولم يرضي اهل المدينه هذا القرار واجتمعوا واعترضوا وقرر الفندق العوده لقرار ال 9 مساء كما كان لان اهل المدينه لا يريدون ان يفتحوا باب لا يحبوه هذا وهو مقهى وهكذا اخونا المغرب تنوع واختلاف وكل ما تريده تجده وانت وضميرك

كما قال شاعر كازا
المغرب غير المغرب عالم اخر
اعمق بكثير من مخاوفك واجمل من تخيلاتك واسهل من تصوراتك عزيزي فهد
تمنياتي لك برحله سعيده ترضي الله فيها ثم ذاتك
تحياتي الحاره لك

اخي العزيز ... كازا مليانه شقق وفلل اهم شي لا تعمل صجه وترفع صوت الموسيقى بالشقق .. اما بالفلل خذ راحتك بس الفيلا تحتاج مجموعة شباب افضل ..
اما الشقق تحصلها بحدود ٦٠٠ او ٧٠٠ او ٨٠٠ درهم .. انا ارشح انك تسكن بشقة واشتر اغراضك من كارفور ولا مرجان وان بغيت شغالة راح يجيبونلك . طبعا الاحياء كثيرة عندك الافضل المعاريف ودو مارس
وبورقون قريب من البحر .
صدقني المغرب سهل وبسيط واهله طيبين بس كل واحد يعرف حدوده .

تمنياتي لك بسفرة ممتعه