وعليكم السلام ورحمة الله
هلا بك اخوي العزيز بندر واولا الف مبروك الزواج والله يوفقكم ويرزقكم الذريه الصالحه
بدايه اهنيك على اختيار المغرب كوجهه لشهر العسل ولن تندم باذن الله ولا تنسى تعطينا انطباعاتك بعد الرحله بحول الله وقوته
ماهو افضل مطار للوصول ويكون قريب من مدينة افران؟
للوصول للمغرب ما عندك الا مطار كازا ومطار مراكش وبعد الكوفيد ما عندك الا مطار كازا ومطار كازا يبعد عن مكناس (وافران) ثلاث ساعات على الاقل وتمر بكازا والرباط واكثر من مدينه فالافضل انه ما تصير اول مدينه لبعدها عن المطار
اذا قررت اقضي المدة بين مدينتين مثلا(مراكش افران)اوطنجة افران ؟
كل مدينه بالمغرب لها ميزات تختلف عن الاخرى وقد تجتمع عدة مدن بميزات محدده اذا علمتنا عن اهم شي بالنسبه لك للسفر نقدر نضيق الخيارات والمدن مثلا الجو/مطاعم/فنادق/طبيعه وخضار/ بساطه وتمشي الخ الخ اخي العزيز
لكن بشكل عام بحكم طول الرحله النسبي فالافضل الاقامه بكازا بحكم انها نقطة الوصول ليومين منها تريح ومنها تشوف كازا لان كازا جميله ومختلفه وهي قلب المغرب النابض ومن ثم الذهاب لمراكش ليومين وزيارة المناطق التاريخيه والتمشي بمراكش ثم الذهاب لمكناس (بس تراها مشوار وطريقها ممتع بس متعب) وفي مكناس تشوف مكناس وتروح للوجهه اللي واضح انك معجب فيها وهي افران
على فكره انا زرتهم كلهم وافران فعلا طبيعه خلابه خصوصا بالصيف جو واعر مزيان وفيه حديقة افران رائعه مدينه نظيفه ونقيه حتى المدن الصغيره اللي حولها خلابه وساحره
السكن والفنادق الافضل والمناسب لعروسين؟
المغرب بشكل عام بلد محافظ واغلب الفنادق مناسبه للعوايل بل كل الفنادق مناسبه للعوايل اذا ابعدت عن مناطق محدده بكازا واغادير و طنجه ومراكش وبالتالي هذا يرجع لذوقك وميزانيتك والحين تقدر عن طريق بوكينق او غيره تشوف الفنادق واراء الناس فيها وتحدد بمعنى لا تخاف من هذي الناحيه اذا تبي فندق محدد اقدر احدد لك لكن بالاخير هي اذواق والفنادق كثيره في المغرب الحبيب واغلبها مناسب جدا للعوايل
استاجر سيارة وتكلفتها؟
هذا نقاش طويل دايم عشاق المغرب يختلفون فيه
عاده عشاق المغرب يتعاملون مع مكتب مغربي يسهل لهم الامور لكن هذي فيها مجازفه وانت بما انك اول مره تسافر للمغرب انصحك باستئجار سياره من المكاتب العالميه المعروفه وهي كثيره بالمغرب الثقه موجوده لكن لازم تنتبه لموضوع الكيلوات المفتوحه كم يعطونك وكم يحاسبونك لو زادت وتراهم يحجزون مبلغ قبل تسليمك السياره ويرجعونها بعد الاطمئنان على السياره اجمالا هي شركه عالميه وتخاف على سمعتها لذلك انصحك فيها
بخصوص الاسعار فهذا حسب نوع السياره اللي تبي لكن بما انك اول مره تروح فالمغرب عنده سيارات فرنسيه جيده ورخيصه يعني مب لازم تدور سياره تعرفها لان غالبا بتكون غاليه انما السيارات الفرنسيه جيده وتفي بالغرض لكن اغلبها ديزل وقير عادي وفيه اتوماتيك والاسعار حسب نوع السياره لكن يمكن تلقى سياره تفي بالغرض وزياده ب 300 درهم باليوم
واخيرا اتمنى من اصحاب الخبرة . ان يقترحوا جدول الرحلة مع العلم ان السفر بيكون في سهر يوليو. وبعتبرها هدية الزواج ????.
الوصول لكازا ثم الاقامه بكازا يومين للراحه والاستجمام والتمشي بكازا وزيارة المعاريف والمدينه العتيقه والتسوق في كازا في مروركو مول ومارينا وانفا بلاس والاستمتاع بمطاعم كازا الرايعه والذهاب لطماريس القريبه جدا من كازا والاستمتاع بالاكلات البحريه فيها
من كازا عبر السياره الى مراكش وقضاء يومين او ثلاثه في مراكش وزيارة ساحة الفنا والمدينه العتيقه وجليز وبعض الاماكن التاريخيه فيها والتمشي في المدن المجاوره
المشكله ان مراكش بعيده عن مكناس لكن يمكن الذهاب لمكناس كرحله تمشيه والاستمتاع بالطريق وزيارة مكناس وحي حمريه وساحة الهديم وشراء اجود انواع زيت الزيتون الذي يخرجونه لك من المزرعه مباشره وزياة بعض المطاعم التقليديه بمكناس وتذوق الطاجين على اصوله وغيرها من الوجبات الشهيه
ثم الذهاب لافران الساحره والاستمتاع بجوها الساحر وطبيعتعا الخلابه والتمشي في ربوعها الخضراء وما حولها
ثم العوده للرباط ورؤية تطور المغرب العصري ولا بأس بالتمشي في اكدال والتمتع بحضارة الرباط وبحرها الجميل واثناء العوده لكازا فالمطاعم في المحمديه لا يمكن تفويتها اطلاقا شواء اللحم على اصوله
طنجه بعيده بعض الشي لكن اذا استمتعت بالتنقل فاركب قطار البراق او بالسياره عبر الطريق السيار واذهب لطنجه لكن طنجه حكايه اخرى تبدأ بطنجه وتمر بتطوان ومارينا والمضيق الرايع ومارتيل الفتيه الساحره انه الشمال يا صديقي فماذا اقول
تمنياتي لك بسفره سعيده وزواج سعيد ويعتمد على رحلتك هل للاستكشاف؟ هل تريد الاستقرار بمكان محدد لاسبوع؟ وغيرها من الامور لكن بشكل عام المغرب ممتعه بكل ما فيها
واي استفسار حاضرين
التعديل الأخير تم بواسطة حبيب طنجة ; 2021-05-15 الساعة 07:42 AM
2021-05-15, 04:17 AM
المواضيع المتشابهه للموضوع: شهر العسل في المغرب
العرض العادي
الدرهم المغربي مقابل عملات الخليج