ما الذي كشفه لك السفر عن الاصدقاء؟

يقولون أن السفر يكشف الأصدقاء على حقيقتهم، فما الذي كشفته لك التجارب السابقة عن أنواع الأصدقاء، وأي نوع من الأصدقاء تحب السفر معه، وأي نوع من الأصدقاء تتجنب السفر معه، وهل تجد نفسك متفتح لتكوين صدقات مع خليجيين في المغرب أم تغلق الأبواب دون ذلك.


ما الذي يمكن أن تتقبله من الأصدقاء في السفر؟ وما الذي لا يمكن تتقبله بحال؟

وهل تجد السفر لوحدك أفضل؟ أم لا؟

والله بالنسبه لي شخصيآ إذا سفره طويله قروب السفر ماأحب أغيره أبدآ وإذا اضطريت أسافر والشباب مايقدرون ياخذون اجازه لو أسافر وحداني لأني طالع بنبسط ولا ابي اقضيها مداراة ومجاملات.
أما سفره ابو يوم او يومين ثلاث بالكثير عادي مع زميل عمل أو أحد الأقارب وعارفين جو بعض طبعآ قبل السفره عشان لاتنكب وينغص عليك.
بالنسبه للتعارف وتكوين صداقات مع خليجيين ماأحرص عليها أبد ماني طالع أدور صداقات ومعارف لأن الشين غطى على الزين .....

وأنا اخوك مافيه صديق بالسفر كامل وانا أولهم

بختصر الموضوع لأني لو شعبته مراح اوقف كتابه شهر قدام

إذا ماتلقى لك صديق ومزاجكم وأجواكم ومتطلباتكم متطابقه ومتفاهمين قبل السفر بكل صغيره وكبيره بنسبه كبيره والا تكون وحداني افضلك بكثير

واذا بتخاوي شخص أياً كان صديق سفر منتم متوافقين بسنبه كبيره أو شخص تعرفه معرفه سطحيه وقابلته ويبي أخوتك أو شخص كفو تعرفت عليه بالسفر خلك حر بسكنك وتنقلاتك وجلساتك ولا يمنع انك تشوفهم كل يوم أو تشاورهم بحدود واذا ماناسبتك طلعتهم أو جلستهم تعتذر منهم بذوق وتروح لوجهتك

لأني والله قابلت رجال شرواكم بالسفر ولا يفكونك كل يوم معزوم عند واحد ولا أقبل منها إلا النادر

يكفي الكلمه الطيبه والإبتسامه والمساعده في بعض الأمور إن كان رأي أو خدمه

أما الردي عندي فراسه اعرفه من شكله واتحاشاه

مره تعرفت على اثنين في اغادير بمحض الصدفه تقابلت معهم فالاصنصير في المارينا وكنت طالع لشقتي وشقتهم بالصدفه كانت جنب شقتي

عزمتهم عندي ومن بعدها صارت بيننا صداقه وطلعنا من اغادير لمراكش مع بعض وبعد مارجعنا للسعوديه سافرنا مع بعض المغرب وبعد فتره طلعنا مع بعض لدبي والمغرب والبحرين ومازالت بيننا صداقه وأخوه وتربطنا علاقه جيده

__________________
لاتسمع كل ما يقال ولا تقول كل ما تسمع.

سافرت وحدي كثير ومع الأصدقاء لكن
مايكرهك بالسفر الا البخيل واللئيم
والصحبة ان تعدت ثلاث أشخاص ماتصلح
والوحدة قاتله مهما قالو لك واجهت أشكال
وأصناف الرجال بعضهم تشرفت بمعرفتهم
وبعضهم فرقاه عيد لكن مشكلتي هي
المجاملة لو انها على حساب نفسي

__________________

السفر يكشف حقايق ربعك ياكثرهم اللي انخدعت فيهم ونادر ماتحصل الشخص الوافي اللي فاهمك وعلي جوك لان الغالبيه اتهمه مصلحته وانا عن نفسي خلصت منهم وصرت اتعامل معهم رسمي لاني شفت العجب

رحم الله والديك عن النار ..ركز لي على البخيل واللئيم بس
شفت بلاوي من هالنوعين يعتبرونك تقديرك وكرمك غباء ويحاولون يسوقون الهبل

بالمختصر

اول سفرة لي ١٩٩٩
واخر سفرة ٢٠٢١

سافرت مع اشكال و الوان من الناس
مهما بحثت عن الكمال مافيه احد كامل ،، حنا أولهم ،، الكمال لله سبحانه

تخلصت من اللئام والحقودين الي مايطوف شي ويشيل بقلبه

البخل موضوع ثاني ،، هذا سيفن عليه بدون عذاب الضمير

الشكاك بعد تخلص منه باسرع وقت

الزبدة ،، سدد وقارب مع اني صرت اميل للسفر لحالي ماعاد فيني طاقة اخذ و أعطي ولاعاد احب الجدال والنقاشات العقيمة ،، باستثناء ناس جوهم مقارب لجوي وينعدون على روس الاصابع و اخليهم للسفرات الجامدة ( البعيدة والمدة الطويلة )







أرسلت بواسطة iPhone بإستخدام مزاعيط المغرب

__________________

BB :
[]

ياخوك لاتذكرني بواحدً اخذته معي خابره عاقل ورزين وهو كفو مسوي فيني جمايل الله يبيض وجهه واخذته معي لبلدً ما والرجال ينفرط علي هناك واول مره يركب طيارة ويسافر ولله يا اثعى في جوي الليل والنهار بعد يومين دقت عليه الحرمة بنته مرضت واخوانه صرفوه قال بروح للرياض وارجع لك قلت مايخالف قال خل شنطتي واغراضي عندك قلت مايخالف في نفسي ولله ماتشوف اغراضك الا مع مرسول عند باب بيتك انت رح بس واغير الشريحة والله يجزاء ام عياله خير الي فكتني منه بغى يوردني السجون والمهالك والمصيبة حتى دخان مايدخن لكن اختلف اختلافً قوي وصار درسً من دروس الحياه مايسمح المكان والزمان اشرح مصايبه وبلاويه الي سواها