تونس بالفم المليان لا تستحق

مرحبا ومسهلا بالجميع

كنت استغرب من زمان عن اللي يزور تونس ولا يكتب عنها بالمنتدى واذا كتب عنها ماتدري هو يمدحها ولا يذمها يبيك تجرب بنفسك وهذا الشي يوهقك كشخص عنده اجازه محدده وميزانيه محدده ماودك تفرط فيها بتجربه ماتعود عليك بالنفع او المتعه ..

كنت متردد قبل الزيارة وماعندي اي ستعداد اغامر لن كنت احس الموضوع فيه مقلب وبصراحة فيه عروض بنفس سعر التذكره لدول افضل وفيها توجهك السياحي اللي انت تبحث عنه وإضافة على ذلك مااملك معلومات عن تونس حتى رؤوس اقلام ماعندي وصديقي كان يلح علي انها جميله وبنستانس

‏قبل ابدآ ابي اوضح شغله كتابتي للموضوع للاشخاص اللي مثلي يبون يزورون بلد ويكونون عارفين شنو ممكن يقابلون من امور سلبيه او ايجابيه ويقررون بكيفهم عاد يا يزورونها او يلغون الفكره

اعيد و اكرر ترا مسافر على حسابي والمواقف صارت معي والمثل يقول الرجال يعد ماواجه
‏
بسم الله

الرحلة بالخطوط القطريه من الكويت الى قطر الى تونس سعر التذكره تقريباً 155 دينار كويتي للشخص الواحد
الرحلة اخر شهر اكتوبر

احنى ثلاث اشخاص

النيه كانت نحجز سياره لكن كنسلنا الفكره والسبب يطلبون وديعة لا تقل عن 700 يورو وبعض المكاتب يطلبون 1000 يورو
تعليقات الاجانب يشتكون من المكاتب مايرجعون المبلغ ويدورون الزله ويتبلون عليك عشان مايرجعون الوديعة .

تواصلنا قبل الرحله مع احد المكاتب وكان تعاملهم فيه نوع من انواع التلاعب عربون بقيمة 280 دينار تونسي عشان يأكد الحجز وراح ياخذ عليك مبلغ 4 بالمية من قيمة العقد اذا راح تدفع فيزا مو كاش

‏قلت حبيبي كنسل الفكره اللي يصير مو طبيعي
‏ذكرت التفاصيل عشان تكون على بينه

اتفقنا على استخدام بولت بالتنقل ويجيك بسيارته تكسي اصفر وقليل تحصل سيارة شخصيه الاسعار معقوله وعلى حسب المشوار وترا ضعيف الاستخدام خارج العاصمة نصيحه لا تسولف معه

بعد ماتوصل بالسلامة للمطار
قبل التفتيش الاخير يبونك تصرح بالعمله الصعبه اللي معك دولار او يورو
اذا كان المبلغ اكثر من 1500 دولار تدفع ضريبه عليها مدري كم والله نسيت ويعطونك ورقه لجيت ترجع وشافو المبلغ معك ماصرفته يسئلونك ليش ماصرفت الفلوس وفسفستها .
اذا كان معك اقل من 1500 مايحتاج تصرح فيها
انا كان معي 800 دولار ماصرحت تعديت مكتب التصريح العملات وقفني العسكري حق التفتيش قال طلع الفلوس وعدها قدامي

المهم بعد ماتعديت من عنده اخذت شريحة اوريدو 10 قيقا ب 20 دينار تونسي

‏ملاحظة مهمة عشان تكون بالصورة بخصوص الكاش ( الان انت معك دينار دولار او ريال او اي عمله بتحولها الى دينار تونسي تمام لكن تبي تغادر تونس ومعك فائض كاش ترا محد ياخذه منك ويطيح بكبدك )

انا استخدم الفيزا كمشتريات مو منتشر لكن موجود الكاش استخدمة في أضيق الحالات

المهم طلعنا برا المطار بعد المشاورات قررنا نجلس بالعاصمة يومين اخترنا منطقة قمرت بالتحديد فندق رمادا السعر لليلة غرفة وحدة ب 344 تونسي

نستكشف العاصمة والصدمة يسكرون المحلات بدري اغلب المطاعم تقفل على 6 المغرب اغلب المطاعم بيتزا وباستا مافيها اماكن حلوه فقط اماكن سياحيه زي البازارات او تروح تقعد عن البحر فيه اطلالات من جهة المرسى وسيدي بو سعيد

شارع حبيب بورقيبة قهاوي ومطاعم حق تجربه لكن مايستحق ترجعله فيها متسولين كثير

لاحظت ان توجه المطاعم يستهدف السائح الاروبي ومتطلباتهم على سبيل المثال الفطور فرنسي من الفجر وهم يبيعون تتعب وانت تدور فطور بلدي او عربي حصلت محل فطور بلدي قال تعال الساعة 10 الحين ماابيع وكانت الساعة 7:40 وقتها و يبيع ملاوي وشباتي وطابونه كلها خبز بس تفرق شي بسط

بعد يومين من الاستكشافات بالعاصمة للامانه مافيها راحه وفيها حنشل كثير طبعاً صدف اول يوم وصول مسيرات دعم لغزه وتحس المدينه فيها فوضه وعدم انضباط وغياب الامن - هربنا من الفوضى والعشوائية

توجهنا الى الحمامات فيه فندق كنا نبيه عندهم العاب مائية والحجز كان بالبوكينق عند الوصول رفض يدخلنا ليش قال ممنوع عزابيه طيب داخل خليطي وكلهم عرايا ويبيعون كحول قال هذا النظام قال الالعاب بحسبها عليكم ب 40 دينار تونسي لشخص بس ماتسكن عندي سحبنا عليه وطلعنا وكنت متواصل مع واحد عنده شقه جيت اشوفها مكانها مشبوه كنسلت حتى ماعندها خدمات رحنى لحمامات ياسمين المكان والمنطقه افضل ب 100 مره من الحمامات نفسها لكن عذروبها يقفلون كل شي الساعة 10 بالليل الويك اند يقفلون 12 بالليل سكنا بفندق والله ناسيه الفندق متواضع المهم الجدول كان الصباح بحر والليل قعده عند القهوه ونرقد بدري لكن والله ملل مافيه انشطه ولا فعاليات عباره عن فنادق جمب بعض ومحلات قهاوي عددها 4 او 5 الزبدة ينعدون على الاصابع جايبين فننانين جزائرية والقهوة اللي ماتقدر تجيب فنان تجيبلك سماعات تفجر الصوت على الاخير هذا بالويك اند بس وكل اللي جالسين عندك عوايل ، ترا مافي حظور يعني لو احلف المنطقه مافيها غير 50 شخص مع الموظفين

نبي نسهر ندور حياة ليلية هذا وهو ويك اند جميع الاماكن اللي زرناها فاضيه اذا حصلت احد تحصلهم كبلز اروبين والجو العام سيئ السبب اغاني جزائريه او اروبيه وسجل عندك البوديقارد يبتزك عند الباب يقول عطني حق الوقفه تقوله بشوف المكان بالاول بعضهم يرفض وبعظهم يوافق تاخذ نظره طبعاً ماسهرنا بس نتفرج على الامكان اشبه بحوش سكراب وليتات حمرا الامان زيو بمعنى الكلمة


خلصنا اليومين هذي وقلنا نشوف سوسه اول ماوصلنا فندق متواضع اتوقع اسمه قولف رسدنت عند الرسبشن قال بلدية سوسة تقطع الماء من العصر لي الفجر نوع من انواع الترشيد على جميع المحافظة وبعض الفنادق الغاليه مضبطين وضعهم تعال رقعها اذا ماعندك خزان فوق المبنى اول مادرينا بالنظام هذا واحد من الربع حلف نرجع للمطار قلت تم وشخطناها لمطار قرطاج صح خسرنا تذكره لكن ارحم من القهر على الوقت الي بيضيع النيه نقعد 7 ليالي لكن اشوف 4 كثير عليها والله .. الحمدلله على كل حال طبعاً فرينا بالسيارة على سوسة كتقييم من اللي شفته ماتستاهل انك تحطها من الجدول

مواقف صارت لنا نذكرها لكم مريت محل حمام مغربي بحمامات يفتقرون الى النظافه الشخصية بمعنى الادوات ليست استخدام مره واحده نفس اللي بالخليج لا يعاد استخدامها مثل الليفه والفوطه والسروال كذالك حتى بالمساج يعطونك بوكسر منلعن سلسفيه وهذا امر غير مقبول ( الحجة على لسان صاحبة المحل ان الاروبي يخاف من الادوات ذات الاستخدام الشخصي وتحسسه بأنه منبوذ ، او لديه تجارب مروعة على حسب وصفه او تذكره بأمر ما ، فا هم يوفرون للاروبي متطلباته ) طبعاً كل مامريت حمام نفس النظام اختصاراً للوقت جبت اغراضي الشخصيه بنفسي ولكن للاسف المساج كان سيئ الحمام كان مقبول

بعض الناس اللي تعاملت معهم يتعامل معك على حسب دولتك وموقفها من جانب القضية الفلسطينيه
طيب وين الثقافة اللي تتغنون فيها طبعاً كمية تناقضات واجهتها بشكل مو طبيعي وتوجه اروبي بحت

فيه اشكاليه لازمتني انا والشباب ان الناس تعتقد اننا جزائريين او ليبيه طبعاً اذا قلت لهم انك خليجي الموضوع يتحول الى تذمر والشكوى من سوى الاحوال المعيشية طبعاً نوع من انواع التسول والبعض الاخر يفرح فيك ويرحب ويهلي

بخصوص الامان على لسان اهل تونس العاصمة يحذروني منها تالي الليل وبعض الاحياء يقولون تجنبها اسلملك
بالنسبة للحمامات حتى وانا بوضح النهار ماخذ الحيطه والحذر اشبها كنك داخل ساحة الفناء اللي بمراكش الناس من حولك تخترش
حمامات ياسمين فيها سلبيه يجونك جزائريين بباص نقل جماعي قروبات من الطبقة الكادحة تلقاهم على الارصفه والقهاوي وراح تسمع الفاض مو حلوه ولا راح تعجبك اشبهم بالمصاريه اذا جوك قروبات
سوسة شفت فيها افارقه وهذا اللي خلاني اتحمس ورجع للمطار

اذا بشبه تونس بالمغرب فهو تشبيه واحد الشرطه والمطار كل واحد يتنافس على الاسوء

‏بالاخير راح اقول زي ماقالو اللي سبقوني وزارو تونس ندمان على الرحله ؟ نعم ماتستحق فيه افضل واجمل ولو ادري من البدابة مارحتلها لكن غشنا السوشل ميديا

الحمدلله على السلامه

شكرا لك على التقرير وخيرها بغيرها بإذن الله

__________________
لاتسمع كل ما يقال ولا تقول كل ما تسمع.

تقرير غير مشجع بصراحه كنت متوقع تونس راقيه في التعامل وناسها متعلمين لكن يبدو مايسمي بالربيع العربي خرب الدنيا والله المستعان
مجهود مقدر وشكرا للتقرير

برشه برشه ...بزاف بزاف

معوض خير عربوش
ول على تعامل لو مضت عليه اسحب عليهم سيفون فمطار هم وقيس سعيد هههه من المطار واطلع لارام 1500درهم ساعتين فكازا

اذا سافرت خارج مجلس التعاون الخليجي خصوصا لدول العرب توقع الاسوء دايما
استغلال ونصب وعنصريه
والغريب انك انت من يدفع وتهان والاوربي يدعسهم ويكرم
عقدة المستعمر والعرق الابيض

والله زين ماسويت ع المطار والله كنت افكر اروح لها لاكن مو بالحيل عليها


أرسلت بواسطة iPhone بإستخدام مزاعيط المغرب

من بعد موضوعك ولا افكر ازورها

من جد برى الخليج اذا فكرت اسافر عندي
مصر وسوريا ولبنان والمغرب
وكلهم بالنسبة لي مضروبه اما المغرب او شرق اوربا او اسيا

والله العظيم ومن خلال عرض طيران السعودية كنت على وشك الحجز على تونس وغيرت في آخر لحظة وحجزت على تايلند.
أنا من رواد المغرب وحبيت اكتشاف تونس ولكن بطلنا .

جزاك الله خير دايم كلام الناس الي راح لها سلبي


أرسلت بواسطة iPhone بإستخدام مزاعيط المغرب