تجربتي الاولى

السلام عليكم، تمنياتي للكل بدوام الصحة والتوفيق
حببت أشارك تجربتي لسفرتي للمغرب وحداني والي كانت أول زيارة. طبعا ماهو اول مرة اسافر خارج السعودية لوحدي. لي تجارب سابقة كثيرة. ايضا جلست سنين خارج المملكة لضروف دراسة وتنقلت كثير لوحدي. الهدف من المشاركة نقل التجربة للفائده حيث اني تعلمت الكثير من القرأه هنا.

الزيارة كانت في شهر جانيوري لمدة عشر ايام تقريبا. الوصول لكازا عن طريق الخطوط المغربية من القاهرة. المطار مشت الأمور فيه تمام، في محاولة على استحياء من موضف الجوازات اني اعطيه شي وقلت له الجايات ان شاء الله ولا عطيته شي ولاكنت بعطيه لو اركب الطيارة الي جيت فيها وارجع القاهرة.

المدن الي جلست فيها كازا ومراكش وطنجة. ما استاجرت سيارة. تنقلاتي كلها طاكسبات وقطارات. الصراحة القطارات عندهم جيدة خاصة البوراق خذته من كازا فوياج لطنجة. جداا ممتاز.
السكن كان كله فنادق. رادسون بلو وفندق لي كازابلانكا في كازا، رادسون بلو في جليز في مراكش، هلتون وبارسيلو في طنجة. كل الفنادق كويسة وامكانها زينة الا رادسون في كازا. مب شي بس الحي قديم.

انطباعي عن المدن، كازا مدينة كبيرة يتوفر فيها كل شي. تعامل معها زي اي مدينة كبيرة وتمشي امورك. اهلها زي اهل المدن الكبرى كل واحد مركز ع حياته اليومية. الطاكسيات الحمر خل معك كاش عشان تحسابهم. بتلقى معه ناس واذا مامعه احد يوقف للناس. هذا النظام في كل المدن. عادي يطلع لك ارخص.

مراكش مدينة سياحية بشكل كبير. اهلها ماعليهم لكن حيستغلونك الطاكسيات حقينهم يزيد عليك كم درهم بس يعني بسيطة تتمشى. حلوة المدينة بشكل عام بس ماجازت لي بحكم الطابع السياحي الي يغلب عليها.

طنجة مدينة جميلة جدا. على البحر والكورنيش حقهم حلو. المارينا يبدو لي متجدد وفيها مطاعم جيدة. نواحي المنارة والمغارة ممتازة جدا. اعجبتني المدنية بصراحة. يعيبها شي واحد الشحاذين لكن مب كثرة. لا تعطيهم وجه ولا توقف لهم وامش وخلهم يتركونك. بتلاحض انتشار الحجاب بكثير في طنجة لو تقارنها بكازا مثلا. الناس هناك حبيبين. الطاكسيات الصغيرة الخضراء نفس نظام كازا انت حدد وين اي جهة رايح شمال جنوب وخلك ع الطريق تركب ويركبون معك ناس. الطاكسي هناك ماراح يستغلك زي مثلا مراكش.

الامن والامان، طلعت في جميع اوقات اليوم صبح نهار مساء اخر الليل، الحمدلله كل شي كان تمام ولم أتعرض لأي موقف.

انطباعي بشكل عام، المغرب بلد جميل جدا واهله ناس حبيبين. ماتوقعته كذا بلد يغلب عليه الطابع الاوربي. قطار البوراق حقهم صدمني. احسن من قطار ركبته من نيويورك لبوسطن.

وسلامتكم ولنا رحلة اخرى ان شاء الله.

تحياتي
خالد

حاب أضيف شغلة اخرى، ماعندهم أوبر. فيه كريم وكم تطبيق ثاني بس يالله تلقى احد.. الوضع متكهرب بين سواقين الطاكسيات والناس الي تشتغل بالتطبيقات هذي، فا يسون مشكلة عند الأماكن السياحية مثلا.. واذا جاك كريم لازم ما توضح انه سواق عن طريق كريم...

جزاك الله خير ????


أرسلت بواسطة iPhone بإستخدام مزاعيط المغرب

حمدالله على السلامة
صحيح فيه حرب ضروس بين التكاسي وتطبيقات التوصيل
اذكر طلبت من البرنامج في كازا وكانت وجهتي على المطار
بهذلوا السواق تفتيش واسئلة ودفعوه اخر شئ

وياك اخوي راشد..
الله يسلمك اخوي هواجيس، فعلا فيه حرب.. لكن التاكسي موجود وبكل مكان مع ان تطبيقات التوصيل اريح. إن شاء الله يحلون موضوعهم وتعم الفائدة للجميع.

وعليكم السلام، شكراً جزيلاً على مشاركتك لتجربتك في المغرب! يبدو أنك استمتعت برحلتك واكتسبت الكثير من الخبرات، خاصة في التنقل بين المدن واستكشاف الثقافة المحلية. شخصياً، لدي اهتمام بالسفر والتعلم من التجارب الحياتية، ولذلك قررت مؤخراً دراسة بكالوريوس علم نفس إداري لأتعرف أكثر على كيفية تأثير البيئات المختلفة على سلوك الأفراد وإدارتهم لمواقف حياتهم. ربما تكون سفرتك قد أعطتك رؤى مشابهة في التعامل مع مواقف متنوعة بشكل فعال. شكراً مرة أخرى على مشاركتك، ونتطلع لسماع المزيد من تجاربك!

تقرير ممتاز