المغرب بين الاحلام الوردية والواقع المر (مراكش - اكادير - كازا)

سلام عليكم ورحمة الله وبركاته
تحية طيبة للمزاعيط

من باب رد الجميل للشباب بالمنتدى ولتوضيح بعض النقاط اللي كانت تجهلني, وان شاء الله يكون الموضوع شامل


رحلتي كانت في تاريخ 27/08/2024 لمدة 7 ليالي وهي اول زيارة لي للمغرب
يومين في مراكش و4 في اكادير واليوم الأخير في كازا

الطيران كان على الخطوط السعودية مباشر الرياض – كازا رحلة الظهر ولكن تأخرت الرحلة قرابة الساعة في الرياض وصلنا كازا بحدود الساعة سبعة ونص العصر

طبعأ كنت حاجز السيارة عن طريق مكتب سفيان دوستر داسيا ب400 درهم لليوم, وكانت خيار جيد نوعاً ما
كان معي مبلغ كاش توجهت لأقرب صراف بالمطار بجانب وفا كاش وكان سعر الصرف 2.508 تقريباً وطلعت بطاقة وفاء كاش (اه يا وفاء كاش), طبعاً المبلغ اللي تودعه يخصمون منه تقريباً حدود 100 درهم ويعطونك البطاقة بظرف مغلق فيه الباسوورد (الباسوورد يجيك مسكر نفس بطايق الشحن انتبه تسوي غلطتي وتقشعه ههههههه), اودعت كامل المبلغ وبقيت معي حق يوم او يومين في مراكش

اخذت سيارتي وعلى كارفور اللي قريب المطار ولكن حصلته مقفل وانطلقت لمراكش, واجهتني مشكلة بطريق السيار لجهلي وبوضحها لكم
الموضوع باختصار تروح اول بوابة اللي عليها سهم اخضر تأخذ التكت وتسددها عند اخر بوابة قبل مراكش ما تتجاوز 100 درهم اعتقد, أي احد يجي يكلمك او غيره لا تعبره

طبعاً كنت حاجز بفندق ريد اللي فوق البولينق الفندق جميل ومرتب لكن ما ناسبني, طلعت للروز قاردن واخذت سويت غرفتين وصالة عند المسبح بقيمة سويت ب1600
جلست فيه يومين المنتجع جميل والمطعم اللي فيه جيد لكن عيبه بعيد ما قدرت اطلع اتمشى بمراكش خصوصاً ان فيه تفتيش ثابت هناك قبل النخيل ويقروشونك على الروحه والجيه

طبعاً خلال جلستي بالروز حاولت اصرف من صرافتي وفاء كاش بس قالولي الصرافة اللي بالروز ما تصرف لازم اروح البنك التجاري, اليوم الثالث قبل مغادرتي لاكادير توجهت للبنك وحاولت اصرف لكن اخطيت بالباسوورد مرتين وانبلعت الصرافه هههههههه وتوجهت لاكادير
في الطريق تواصلت مع احد الأصدقاء المغاربة بالإضافة للأخ العزيز سفير مراكش (أبو يحيى) ولهم كل الشكر, ووضحوا لي انه ما اقدر اخذ فلوسي من الوكالة باكادير الا لما اجيب الصرافة من البنك في مراكش
والحل الوحيد عندي اني أقول ان صرافتي ضايعه, طبعاً وصلت لاكادير ومباشرة توجهت لفرع الوكالة في المارينا وبعد صراع يومين ودخولي لثلاث مراكز شرطة قدرت اخذ فلوسي ههههههههه (النظام هنا بدائي جداً للأسف لما تقول انك ضيعت صرافتك لازم تروح ترفع بلاغ عند الشرطة)

المدة كاملة في اكادير سكنت في صحارى كانت الليلة ب1400 درهم, الفندق جيد لكن اثاث الغرف قديم للامانة وعوازل الصوت مش ولا بد

واخر يوم بالرحلة توجهت لكازا مباشرة وسكنت في رديسون بلو فندق راقي جداً للامانة, تعشيت بنفس الفندق بالسطح وطلعت تمشيت شوي لكن المدينة هادية جداً على الرغم من كبرها واستغربت يومها ان اغلب الأماكن مغلقة (كان يوم اثنين) ونمت ومن بكره صحيت وتوجهت لسوق الحبوس اشتريت قفطان وثياب وبعض الأغراض وعلى المطار

المطار طبعاً في الدخول وفي الخروج واحد من اسوء المطارات اللي دخلتها او رح ادخلها بحياتي من كل النواحي عند كل خطوة اي موظف يلمح لك او يصرح لك صراحة بالبخشيش, بالنسبة لمراكش ما قدرت اتمشى فيها بسبب الدرك والبوليس والحملة اللي صايره يكرهونك بطلعة السيارة, اكادير مدينة جميلة جداً جلسة مبروك لوحدها تفتح النفس, كازا ما فيها أي شي وتحسفت على اليوم اللي ضاع فيها لكن كنت احتاج يوم هادي نفس كذا عموماً

البلد يعيبها كثرة الشحاذين وتحس الكل طمعان فيك في كل مكان سواء في مراكش او اكادير (للامانة ما شفت الشي هذا في كازا)

فيه تفاصيل أخرى اعتقد ذكروها الشباب مسبقاً ومتعارف عليها وماله داعي التطرق لها, عموماً المغرب بلد جميل ويستحق الزيارة لكن شعوري تجاه البلد كان خيبة أمل بناء على توقعاتي
لي زيارة أخرى للشمال المغربي او لاكادير فقط.

ودمتم بصحة

بالنسبة للمطاعم

في اكادير جربت المندي عند بيت المندي واسماعيل كانوا جيدين مو مره واو
مبروك عندهم طاجن لحم بالبرقوق لا يعلى عليه

جربت الطاجن عند مطعم السقاله في كازا كان مش ولا بد الله يديم النعمة والجلسة ما اعجبتني

نصايحي:

- خلك رسمي مع الجميع في كل مكان (لا ترد على احد ما تبغى ترد عليه)
- اذا انت ذيب خل فلوسك معك كاش ولا تطلع وفاء كاش ولا غيره (او طلع بطاقة سعودية نفس برق وغيرها)
- اذا انت وحداني زيي خل رحلتك كاملة في اكادير غيرها لا والف لا
- اذا ميزانيتك راهيه وبتشري راحة بالك خلك على التكاسي ولا خذ سواق مع السيارة
- الوقت مسرووووق، حدد وضع سفرتك من بدري وانسى انك تجمع سهر وتمشية

نقطة اخيرة

اذا انت منت "راعي صنف" فيه خيارات كثيييير اقرب واحسن من المغرب للامانة

عوداً حميداً

أختلف معك في بعض الأمور
خلك مبسوط وابتسم ولايهمك احد دامك في حالك وكافي الناس خيرك وشرك

غلطتك في الرقم السري هو اللي خلاك تكرهه بطاقة الصراف مع انها أفضل بالنسبة لي من الكاش

لوحدك أو مع شخص بتنبسط بالركادة وعدم الاستعجال

والسيارة مو شرط أساسي في المغرب

مدتك القصيرة هي اللي خلتك تستعجل في بعض الأمور


أرسلت بواسطة iPhone بإستخدام مزاعيط المغرب

تقرير مختصر ومفيد جدا وخصوصا للي يزور المغرب اول مره
الخبير يتجاوز معظم السلبيات اللي مرت عليك ، تجاهل وتجاوز ولا تجاوب إلا اللي تبي
السياره جرّبتها حلوه وتوفر عليك وقت لكن الوحداني انصحه بالتكاسي والقطار بين المدن افضل شرطه مراكش مزعجه جدا وتتصيد الخليجيين تحديدا دون غيرهم لدرجه الابتزاز احيانا للاسف
لكن للجروب ضروري سياره ، الشمال محترمين الشرطه وماحد يغثك

ان شاءالله تستمع بالرحلات الجايه وحاول تطول الوقت شوي ع الاقل اسبوعين
والسكن جرب بدايل اخري مثل بوكينج او بي ان بي .